Price Level: Expensive
Egypt
للأسف تجربتي مع شركة هومزمارت (Homezmart) كانت سيئة جدًا، وبصراحة من التجارب اللي خلتني أندم إني اتعاملت معاهم من الأساس. بدأ الموضوع لما اشتريت منتج ضمن عرض 100% كاش باك بالتعاون مع ValU، وبعد كده استخدمت قيمة الكاش باك في طلب جديد من هومزمارت. المفاجأة إن المنتج اللي وصلني مكانش مطابق للمواصفات اللي طلبتها، وبالتالي رفضت استلامه، وكنت متوقع إن استرداد المبلغ يكون إجراء طبيعي وبسيط، خصوصًا إن المشكلة مش من طرفي. لكن للأسف، بدل ما الشركة ترجع المبلغ لنفس وسيلة الدفع، بدأت تحاول تقنعني إني أقبل المبلغ في صورة Voucher أستخدمه في الشراء منهم مرة تانية، رغم إني وضحت أكتر من مرة إني مش عايز أتعامل معاهم تاني وإن من حقي أسترد المبلغ. ولما أصريت على استرداد المبلغ، فوجئت برد رسمي منهم بيقول إن هيتم تطبيق غرامة على المبلغ المسترد لو اخترت استرجاعه لجهة الدفع الأصلية! والأغرب إنهم ما وضحوش قيمة الغرامة، ولا نسبتها، ولا الأساس اللي بيتم فرضها بناءً عليه، ولا حتى مين المسؤول عنها، هومزمارت ولا ValU. السؤال هنا: ليه العميل يتحمل غرامة بسبب منتج وصله غير مطابق لطلبه؟ وليه أكون مجبر أشتري من نفس الشركة مرة تانية بدل ما أسترد فلوسي؟ وده غير إن أسعار هومزمارت من وجهة نظري مبالغ فيها جدًا مقارنة بالسوق، والأسعار دي المفروض يقابلها مستوى محترم من الجودة وخدمة العملاء، لكن اللي شوفته في تجربتي كان العكس تمامًا. كمان التجربة خلتني أتساءل عن مدى وضوح عروض الكاش باك اللي بيتم الترويج ليها، خصوصًا لما العميل يكتشف إن استرداد المبلغ ممكن يتحول لسلسلة من التعقيدات والخصومات غير الواضحة. لحد دلوقتي، تجربتي عبارة عن منتج غير مطابق، ومحاولات لتحويل حقي في الاسترداد إلى Voucher، وتهديد بخصم غرامة غير موضحة، ومجهود ووقت ضايعين في المطالبة باسترداد المبلغ. أنا بكتب التقييم ده علشان أي حد بيفكر يشتري من هومزمارت، وخصوصًا من خلال عروض الكاش باك، يبقى عارف تجربتي قبل ما ياخد قراره. عن نفسي، لا أنصح بالتعامل مع Homezmart بناءً على تجربتي، ومش ناوي أكرر التعامل معاهم.
Qayymm Shopper
